Kiko manera ta determiná país di residensia fiskal òf domisil?

Tur persona tin un país di residensia fiskal i tur organizashon tin un país di residensia fiskal. Institushonnan finansiero ta obligá pa determiná e residensia fiskal òf país di residensia di nan klientenan. Nan ta hasi esaki den un manera distinto pa klientenan nobo kompará ku klientenan eksistente.

Un kliente nobo

For di 1 di yanüari 2016, institushon finansiero den paisnan di CRS ta obligá pa hasi klientenan nobo yena un ‘deklarashon propio’. Na Kòrsou, persona natural por hasi esaki ku e formulario ‘Determinashon di residensia fiskal’ i organizashonnan ku e formulario ‘Determinashon di status fiskal’. Kasi tur institushon finansiero na Kòrsou ta usa e formularionan aki, ku a ser komponé pa Ministerio di Finansas.

Un kliente eksistente

Pa klientenan ku tabata tin kuenta kaba na 1 di yanüari 2016, e institushon finansiero por konta riba e informashon ku nan tin kaba. Si tin un duda ku e informashon aki no ta korekto, e institushon mester pidi e kliente pa duna un deklarashon propio. Un rason pa esaki por ta, pa ehempel, si e persona muda pa un otro país, si e kliente duna un number di telefòn estrañero, òf si e informashon ta kaduká.