Kuminsando dia 30 di novèmber 2020, FIU Curaçao lo dal e di 4 Stap, di un total di  5, pa   yega na e portal nobo pa mèldu goAML.  For di 30 di novèmber 2020 te ku 11 di desèmber 2020 FIU Curaçao lo tene seshonnan virtual instrukshon tokante e forma pa mèldu transakshon no usual den e portal nobo pa mèldu goAML. E seshonnan di instrukshon lo ta spesífiko pa kada sektor.

Tur entidat ku tin e deber di mèldu ta haña oportunidat pa  nan siña kon mester mèldu transakshon no usual, den e portal nobo di goAML, pa asina   nan por sigui mèldu despues di 1 di yanüari 2021. E proseso pa mèldu den goAML ta diferente for di e proseso di mèldu den Corsys. Hasta si a kustumá di mèldu transakshon no usual den e portal bieu, tòg e entidat ku ta mèldu lo mester risibí instrukshon pa por mèldu den e portal  nobo goAML.

E proseso di implementashon di goAML tin un skema pèrta.  Nos ta hasiendo tur esfuerso pa logra un transishon suave pa tur entidat ku mester mèldu. Nos ke pidi tur entidat ku mester mèldu pa tuma bon nota di tur anunsio ku nan risibí i tambe pa nan partisipá na e seshonnan virtual di instrukshon ya nan por ta kla pa por mèldu transakshon no usual den e portal nobo for di 1 di yanüari 2021.

FIU Curaçao a introdusí un e-mail adrès speshal pa e entidatnan ku mester mèldu por usa pa preguntanan spesífiko, i otro petishon pa informashon, tokante e proyekto di goAML: goaml@fiucuracao.cw.

Pa pregunta general tokante mèldumentu na FIU Curaçao, tuma bon nota di e informashon tokante esaki riba nos wèpsait (www.fiucuracao.cw, bou di “REPORT”) òf tuma kontakto ku nos via analysis@fiucuracao.cw, òf via telefon: 4626588.