NOTA DI PRENSA: AHUSTE DI E MANEHO DI KOBRANSA DI SERVISIO DI IMPUESTO For di 2010, Ontvanger ta aplika un regla di saneashon di debenan di impuesto i primanan sosial i tambe a yega di aplika “opschoning” di e aanslag di impuesto i primanan sosial ku no a wordu paga. Den aña 2015, por ehempel, a “schoon op”e sistema di Ontvanger, pa medio kual a ekskluí mas di ANG 900 mion di aanslagen di mas di 5 aña bieu. Sin embargo, ahustenan nesesario di maneho i di e organisashon pa evita kresementu di e kantidat di aanslagnan atrobe no a tuma luga e tempu ei.

For di instalashon di Gabinete Pisas na yüni 2021, a duna prioridat na kobransa di debe di entre otro, impuesto, primanan sosial i na eliminashon di atrasonan administrativo di Servisio di Impuesto. Esaki tabatin hopi éksito pa ku entrada di impuesto i primanan sosial i Servisio di Impuesto a pone hopi aanslagnan atrasa. Dor di pone e aanslagnan atrasa, e suma ku mester a kobra a krese te ku un montante nominal di ANG 5.7 mil mion na debenan di impuesto i primanan sosial, partí over di 130.000 number di Crib. E kandidat aki ta hasi kobransa efektivo di tur debenan imposibel i ta buta ku tin ku stipulá prioridatnan pa ku kobransa di e debenan aki. Un ekipo di eksperto a hasi varios análisis pa determina kon por redusi e kantidat di aanslag pa kobra na un nivel manehabel. Den e kuadro aki a keda kla ku e uso usual di fecha di aanslag (“dagtekening”) komo base pa priorita, no ta kondusi na un efekto desea. Investigashonan internashonal (OECD, 2019) ta demostra ku e probabilidat pa rekupera debenan di impuesto ta redusi ku tempu. Un investigashon similar na Kòrsou a yega na e mesun konklushon: 50 % di entrada ta wordu optene den 2 aña despues di imponé aanslag i 90 % di entrada ta wordu optene den 5 aña. Pa e motibu aki e entrada después di 5 aña ta marginal, i ademas kobransa di aanslagnan mas bieu di 5 aña ta rekeri un kapasidat mas grandi ku kobransa di aanslagnan mas yòn ku 5 aña. Na final di aña 2022, e kantidat di aanslag pa kobra dor di Ontvanger ta kontené aanslagnan te ku aña 1994. Pa redusi e kandidat di aanslag na un nivel manehabel i tambe pa duna e Servisio di Impuesto den su totalidat e oportunidat pa traha den aktualidat, Servisio di Impuesto a adapta nan maneho di kobransa. Basikamente, e adaptashon ta ensera ku aanslagen for 2017 of mas bieu lo no wordu kobra aktivamente. Esaki enfatikamente no ta ensera ku a duna eksonerashon (“kwijtschelding”), pero ku Servisio di Impuesto ta konsentra riba kapasidat pa rekauda/kobra aanslagnan mas yòn ku posibilidat mas haltu di kobransa. No obstante esaki tin 3 eksepshon riba e regla prinsipal di maneho di kobransa, kual ta lo siguiente. Aanslagnan di añanan 2017 i mas bieu lo wordu kobra si esaki a wordu impone den kuadro di un investigashon penal fiskal, si e debe di impuesto di e añanan 2017 of mas bieu ta ANG 1 mion of mas i si Servisio di Impuesto tin informashon ku ta demostra ku tin posibilidat di kobransa, of si e debe di impuesto di e añanan 2017 of mas bieu ya a ser pagá via di kuentanan di tersero (derdenrekening manera entre otro di notarionan). E kambio di maneho aki tambe ta ensera ku apelashonan (“bezwaarschriften”) pa añanan 2017 of mas bieu lo no wòrdu prosesa mas, a menos ku e kontribuyente manifesta ku e tin interes pa esaki wòrdu prosesa. Esaki por ta e kaso si na momentu ku konsede / bai di akuerdo ku e apelashon, kual ta resulta den restitushon di un suma ku a ser paga of “verrekend”. Di e forma aki, e ahuste di e kobransa di maneho tambe ta kontribuí na e redukshon di kandidat grandi di obheshonan (“bezwaarschriften”). Alrededor di 25% di aproximadamente 45.000 obheshonanan (“bezwaarschriften”) relashona ku añanan 2017 of mas bieu lo mester a wòrdu prosesa ahinda. Pa aña 2023 metanan a ser fiha pa Servisio di Impuesto, ku tin ku resulta ku e organisashon lo traha i lo sigui traha den aktualidat i ta mehora e kalidat di servisio. Si ta posibel lo hasi uso di ICT den e kuadro aki. Periodikamente, Servisio di Impuesto lo raporta na Minister di Finansa, sr. Javier Silvania, en kuanto e progreso di e aktividatnan aki i e pueblo tambe lo ser informá periodikamente.

Willemstad,
3 di aprel 2023