Manera mi a yega di bisa: “momentunan interesante pa un mandatario ta ora ku akshon e demonstrá ku bienestar di tur hende ta importante. E mandatario semper mester kumplí ku su palabra i konsiderá e komunidat ku e ta sirbi den tur desishon”. Situashon di Kòrsou ta un reto pa nos tur. Un di e retonan grandi ku ami a enkontrá komo Minister di Finansa, tabata e echo ku na aña 2017, na momento ku mi a bira Minister di Finansa, ahinda e relatonan anual di 2014 te ku 2016 no a keda aprobá. Awe ku hopi orguyo i satisfakshon mi por bisa ku den aña 2020 nos a logra aprobashon di relatonan anual di 2014 te ku 2018 dor di Parlamento di Kòrsou. Ku esaki mi a kumpli, pa finalisá e proseso ku un presupuesto tin ku kana, konforme nos areglo di estado. Durante e promé kuartal di 2021, lo mi hasi mi máksimo esfuerso pa e relato annual di 2019 tambe keda aprobá. Mi kier gradisí henter Ministerio di Finansa pa e bon trabou ku nan a hasi pa huntu nos por a logra esaki. Esaki ta un logro grandi pa Kòrsou, mi ta spera di por sigui kontribui na e desaroyo positivo aki i ku den futuro Kòrsou lo no bai bèk den un situashon asina mas.