Willemstad – Minister di Finansa, Kenneth Gijsbertha ta satisfecho ku e progreso ku a hasi for di kuminsamentu di e aña aki pa loke ta trata modernisashon di e sektor di iGaming (sektor di weganan di pustamentu, azar i casino via medionan elektróniko òf internèt).

ICE London

Den febrüari di e aña aki Minister Gijsbertha a bishitá e konferensia internashonal di mas grandi di mundu ICE London. Na e konferensia aki ta partisipá mas di 9000 kompania aktivo den e negoshi aki, representando mas di 150 pais. Akinan Minister Gijsbertha tabatin oportunidat di sera konosí ku tur partisipante importante riba nivel mundial i tambe eksplorá i haña oportunidatnan nobo di negoshi i di koperashon pa loke ta trata e sektor aki ku lo por benefisiá Kòrsou; por sierto ku Kòrsou ta ser konsiderá un hurisdikshon hopi popular i respetá mundialmente.

E bishita por ser kategorisá komo unu hopi èksitoso, komo ku a logra hasi kontakto i haña informashon hopi balioso ku lo por sirbi pa yuda Gobièrnu di Kòrsou den su esfuerso pa modernisá e sektor aki, ku pa Kòrsou lo por bira un fuente importante di entrada di impuesto, loke te ku aworaki no tabata e kaso.

Landspakket

Den e palabrashonnan ku a ser hasi ku Hulanda aworaki den kuadro di ayudo di likides, a inkluí tambe ku lo bai buta mas atenshon na modernisashon di e sektor di iGaming. Lo bai hasi e kambionan nesesario den legislashon pa e sektor tambe kuminsá aportá na kaha di Gobièrnu i karga responsabilidat den kuadro di regulashon responsabel. Esaki ta konforme tur práktika internashonal. Tambe lo mehorá e struktura di duna lisensia, supervishon i regulashon di e sektor di tal manera ku Gobièrnu mes lo haña un ròl mas aktivo den e totalidat. Minister Gijsbertha no ta di akuerdo ku gritunan di sierto gremionan ku ta duna impreshon ku ta bou di preshon di Hulanda a kuminsá ku e trayekto di modernisashon di e sektor di iGaming. E minister ta duna di konosé ku ta bon pa señalá ku ta Kòrsou mes a tuma e inisiativa pa modernisá e sektor.

Desaroyonan nobo

Minister Gijsbertha tin intenshon pa sigui desaroyá e sektor aki den aña binidero. Un bon ehèmpel ta e desaroyonan sumamente positivo ku a tuma lugá na Malta for di 2010. Importante ta pa sigui konsentrá riba e parti positivo di e trayekto i no desviá for di esaki. E meta i desafio prinsipal ta pa sòru, na promé lugá, pa tur suidadano di Kòrsou por probechá di e desaroyonan, i despues kompanianan internashonal. Te ahinda esaki no ta logra na tur okashon.

Reforma i su konsekuensia

Minister Gijsbertha no ta di akuerdo ku e ponensia ku e reformanan den kua Kòrsou ta modernisá su regimen fiskal i regulatorio di e sektor di iGaming, kumpliendo ku tur regla internashonal, lo por resultá den daño na e reputashon di Kòrsou komo sentro finansiero of un bahada den e kompanianan ku ta operá den e sektor di trust. Al kontrario, tin benefisionan hopi importante pa tur hende. Mas sen i presupuesto pa Gobièrnu, mas trabou, mas oportunidat pa edukashon digital, i mas respèt pa Kòrsou den e mundu finansiero. Di otro banda e kompanianan den e sektor no por sinta man krusá. Meskos ku tur otro kompania nan mester adaptá na kambionan ku lo ta na bienestar di e pueblo di Kòrsou en general. No por akseptá ku probecho finansiero ta disparsé den saku di un grupo chikí di negoshante estranhero di paisnan manera Bulgaria i Hungaria.

Kontròl

E eksperensia na e konferensia na London den algun kaso ta duna un sintimentu miksto, ora tuma nota ku un kompania internashonal ta ofresé lisensianan internashonal di casino i otro weganan di pustamentu i hasu uso di e bandera i nòmber di Kòrsou, kaminda ta kobra montantenan ku ta yega NAfl. 200.000 pa kada un, i ni Gobièrnu ni pueblo no ta mira nada bèk di e sen aki. Esaki no ta akseptabel i Minister Gijsbertha ta konsiderá esaki asta komo a-sosial. E intenshon ta pa bai kuminsá aktua kontra di e tipo di práktikanan aki, i pa logra ku finalmente e sen ta resultá den kaha di Gobièrnu di Kòrsou, kaminda lo por hasi bon uso di djé na bienestar di pueblo. Esaki ta netamente un inisiativa di Gobièrnu di Kòrsou.

Konsulta

E asosiashon di e kompanianan ku ta fasilitá e aktividatnan di weganan di pustamentu, azar i casino via medionan elektróniko of internèt di Kòrsou (Curacao Internet Gaming Association – CIGA) aworaki a proponé pa lanta un komishon pa atende ku reformanan di e sektor, pero na e momentu aki Sr. Gijsbertha no ta mira e balor agregá di esaki. Pa medio di konsulta ekstensivo ku diferente gruponan tantu lokal komo internashonal tin sufisiente informashon pa Gobièrnu por dal e stap aki, ku ta mas bien intenshoná pa modernisá aktividatnan di Gobièrnu i generá entrada; ademas komunidat ta sinti un nesesidat hopi grandi pa drecha ekonomia di Kòrsou riba término kòrtiku. Un komishon lo por stroba un desaroyo rápido siendo ku COVID-19 a siña nos ku mester move ku muchu mas determinashon.

Kondishonnan básiko

Tambe Minister Gijsbertha ta kuestioná e ponensha di CIGA ku no tin e kondishonnan básiko pa por hasi negoshi “normal” na Kòrsou. Ku lo mester habri fronteranan pa trahadónan estranhero den e sektor di iGaming i tambe duna mas insentivo finansiero pa esaki. Na opinion di Minister Gijsbertha pueblo di Kòrsou a kontribuí mas ku sufisiente bou di kondishonnan aktual i ku atrakshon di trahadónan internashonal (a menos ku ta hendenan spesialisá) ta duna e señal robes na pueblo. Esaki lo stroba hasta desaroyo positivo di empleo den e sektor di iGaming mes tambe.

Lisensia/ “vergunning”

Loke si Minister Gijsbertha ta di akuerdo kuné ta e ponensia di CIGA ku e sistema aktual di otorgá lisensia por ta motibu ku no ta wak término largu na momentu di tuma desishonnan. No ta un sekreto ku e outoridat di kontròl di e sektor di iGaming na Malta (Malta Gaming Authority) no ta masha amante di uso di e lisensia di Kòrsou den nan huridikshon. Malta no ta tuma e kompanianan ku ta funshoná ku e lisensia di Kòrsou aki hopi na serio pasobra nan tin duda ku Gobièrnu di Kòrsou tin sufisiente bista riba e lisensianan aki. E kambionan ku Minister Gijsbertha ke introdusí aworaki ta netamente pa garantisá ku esaki lo ta e kaso i e ta apresiá CIGA su punto di bista den esaki. Esaki ta duna Gobièrnu di Kòrsou espasio pa ekspandé su propio posibilidatnan pa krea e fondonan (likides) nesesario pa por yuda garantisá prosperidat dentro di e sektor i tambe pa pueblo di Kòrsou en general, na un manera mas balansá i korekto.

Minister Gijsbertha ta satisfecho ku e pasonan ku a ser lográ te ku aworaki. E plannan pa reforma i modernisashon di e sektor lo ser presentá promé ku e di dos kuartal di 2021 (manera palabrá den e areglo ku Hulanda).