Skohe un tópiko 
Bo tin pregunta?
Kompartí e página aki
Derecho di dedukshon di 4.5% ta keda mantené
Publiká riba 16 October 2020
| Manera ta bon konosí pa tur hende, Gobièrnu te na e momentu aki a hasi fiansa di 126 mion florin serka Hulanda pa duna sosten na empresa i kompania individual via di NOW pa mantenshon di kupo di trabou.
E sosten finansiero na tur ku a pèrdè trabou òf ta buska trabou i tambe e grupo ku ta kobra ònderstant a keda finansiá for di propio presupuesto di Gobièrnu. Pa sigui garantisá sosten finansiero na e grupo mas vulnerabel aki, Gobièrnu a tuma un desishon pa kuminsá ku e proseso pa eliminá e derecho di dedukshon di 4.5% di OB na entrada. E desishon aki mientras tantu a keda revoká. Mientrastantu Gobièrnu di Hulanda a komprometé pa pone fondo disponibel pa medio di fiansa pa Gobièrnu por sigui duna sosten na e grupo ku a pèrdè trabou òf ta buska trabou i tambe kobradó di ònderstant. Hopi ta esnan ku ta aserka Gobièrnu último dianan ku e pregunta ku si ta bèrdat ku Gobièrnu a eliminá e derecho di dedukshon di 4.5% OB pa motibu ku nan ta konstatá ku empresanan ta oumentando nan preis, alegando ku nan ta hasi esaki pasobra Gobièrnu a eliminá e derecho di dedukshon. Pa medio di e komunikado aki Gobièrnu ta informá ku e derecho di dedukshon di 4.5% di OB ta keda mantené te na momentu ku lei di ABB drenta na vigor entrante 1 di yanüari 2021. |