Nos pais ta pasando den un situashon finansiero i ekonómiko sumamente difisil. Pa tantu e siudadano komo gobièrnu no tin sufisiente plaka.  Minister di Finansa su tarea ta di hiba un maneho finansiero sano ku ta enserá tambe kobra impuesto atrasá. Tur hende i tur instansia ku ta laborá i/o sea hasi negoshi na Kòrsou  mester paga  impuesto riba entrada i/o ganashi. Tambe tin e deber di kumpli ku pago di tur impuesto, segun ley i maneho di pais. Asina ta kontribuí pa pone sèn den kaha di gobièrnu. Gobièrnu ta usa e  sèn pa enseñansa,  salubridat, drecha kaya i paga personal. Si un siudadano tin difikultat pa paga belasting e por bini na remarke  pa drenta un areglo di pago na Ontvanger. Esaki no ta nada nobo. Tambe Minister di Finansa a krea e oportunidat  pa haña kwijtschelding (saneá debe di impuesto).

Pa bini na remarke pa hasi uso di saneamentu di bo debe di belasting, lo siguiente: 
1. Mester manda un petishon na e adrès di e-mail: sanering@gobiernu.cw òf por tuma kontakto na tel. 734-2224. 
2. E persona ku ta bini na remarke pa haña e saneamentu lo risibí un formulario pa yena su dato ariba i mester firm’é i mand’é bèk na e adrès di e-mail ya menshoná. 
3. Despues ku Ontvanger risibí e formulario bèk, lo e manda e akuerdo di saneamentu pa e persona firma i alabés hasi e pago akordá riba kuenta di Ontvanger.
4. Ora Ontvanger risibí e formulario firmá bèk i e komprobante di e pago hasi dor di e persona ku a hasi e petishon, e ora ei e akuerdo ta kompletá i lo no molestiá  pa e restante di e debe den e saneashon, teniendo kuenta ku e kondishonnan di saneamentu.

Pa haña e formulario pa hasi petishon pa bin na remarke pa sanea debe di impuesto klek klek riba: https://minfin.cw/saneringsregeling/