Djarason 7 di yüli último, Minister di Finansa a risibí un karta di Banko Sentral di Kòrsou i Sint Maarten, fechá 6 di yüli, kaminda ta indiká ku Banko Sentral di Kòrsou i Sint Maarten lo eliminá e moneda di 1 sèn for di sirkulashon i ku e desishon aki ta karga sosten di diferente grupo di interes.

Minister di Finansia, sr. mr. drs. Javier Silvania a tuma nota di e karta aki, ku pa su sorpresa Banko Sentral di Kòrsou i Sint Maarten a tuma un desishon asina sin ku a konsultá e desishon aki ku e minister responsabel, kual ta Minister di Finansa. A indiká na Banko Sentral di Kòrsou i Sint Maarten ku lo bai reakshoná riba e karta. Pa sorpresa di Minister di Finansa, e siguiente dia, 8 di yüli, e karta a sali den medionan di komunikashon, sin ku Minister di Finansa a haña oportunidat pa duna su reakshon.

E moneda di 1 sèn, konforme lèi, ta un moneda di pago legítimo. Ku otro palabra, no por saka e moneda di 1 sèn for di sirkulashon, sin hasi e kambionan nesesario den lei.

Komo konsekuensia di e redondeo aki, produktonan riba merkado por bira mas karu i konsekuentemente kosto di bida lo subi. Den e situashon di krisis aki i mirando e situashon finansiero krítiko di esnan mas vulnerabel den nos komunidat, un subida di kosto di bida no ta apropiá i no ta kuadra ku vishon di e gobièrnu aktual. Sinembargo, e echo ku presidente di Banko Sentral di Kòrsou i Sint Maarten ta tuma un desishon ku hurídikamente no ta korekto ta un echo di lamentá. Ta bon pa indiká tambe ku e konsiderashon pa saka e moneda di 1 sèn for di sirkulashon, ya a yega di tuma lugá den pasado. Despues di un investigashon amplio, a disidí pa no sigui ku e ruta aki, pa evitá eféktonan negativo ya menshoná.