Bo tin algun pregunta? Klek riba e siguiente link.
Tuma kontakto >Publiká riba 19 August 2016
Disponibel na hulandes tambe
Willemstad – Dor di e modernisashon di e Servisio di Impuesto por prosesá pagonan via banko mas eksakto. E maneho ta dirigí alabes riba redukshon di uso di sèn kèsh na kaha. Pago via banko, ku uso di e referensia di pago úniko korekto i lesamentu di e bankstatement digital serka Ontvanger, ta simplifiká e trabou i ta minimalisá chèns di hasi eror. Minimalisá uso di sèn kèsh na Ontvanger ta den liña ku desaroyonan mundial i tambe nos isla. Entrante 1 di oktober 2016 lo no akseptá sèn kèsh, cheques i pago ku Kompa Leon mas na lokètnan di Ontvanger. Solamente lo por ‘swipe’ pa hasi pago.
Bon uso di referensha di pago úniko ta importante
E referensia di pago úniko (uniek betaalkenmerk) ta e number úniko ku mester usa separá ora di pago. E intenshon di e referensia di pago úniko aki ta ku por registrá e pago online mesora na e forma korekto. Ta hopi importante pa hasi kada transakshon separá i ku kada un su referensia di pago konserní.
Mester paga kada impuesto online pa kada periodo separá. Asin’aki e kliente di Servisio di impuesto tin e siguransa ku esaki ta korekto i ku por prosesá esaki outomátikamente den e sistema. Pago di por ehèmpel impuesto riba ganashi, impuesto riba benta i impuesto riba entrada , tur huntu den un transakshon bankario, ta sòru pa tardansa i eror na momentu di prosesá esakinan ya ku no por mira tur ora kua suma ta pertenesé na kua impuesto. Importante pa remarka den esaki ta ku transakshonnan hasí via online banking ku Ontvanger lo no tin gastunan adishonal na e siguiente bankonan: MCB, Banco di Caribe, Orco Bank, GiRO bank, en First Caribbean International Bank (CIBC).
Lesamentu outomátiko di pagonan riba statement di banko
Pa atministrá mas mihó posibel e pagonan ku e kliente di Servisio di impuesto a hasi via banko, a introdusí e sistema pa lesa e statement di banko via un sistema outomatisá. Dor di esaki entretantu por prosesá atministrashon korekto mesora di mas ku 65 % di entrada den un biaha. E porsentahe no a alkansá 100% ainda debí ku no ta tur kliente di Servisio di Impuesto ta hasi uso optimal di e referensia di pago úniko ainda. Pues un biaha mas ta urgí un i tur pa usa kada number úniko pa kada tipo di impuesto hasiendo kada pago separá. Por fabor nota ku e number úniko aki ta diferente pa kada transakshon.
No ta paga restitushon kèsh
Komo parti di e desaroyo di ménos sèn kèsh na kaha di Ontvanger entrante 1 di oktober 2016 no ta posibel pa risibí restitushon kèsh mas serka Ontvanger. Pago di restitushon por tuma lugá solamente via kuenta di banko di e kliente di Servisio di impuesto. Lo hasi menshon di e kambio aki den kartanan di Ontvanger den kua ta nota e kliente tokante di su restitushon. Tambe lo tin un lokèt na Ontvanger kaminda lo por registrá kuenta di banko entrante 1 di sèptèmber 2016.
Ta bon tuma nota tambe ku entrante 1 di sèptèmber 2016 Ontvanger lo dedusí tur debe habrí riba impuestonan promé for di un potensial montante di restitushon promé ku pagá e restitushon. Den e mes un karta lo indiká tambe ku lo paga eventual restitushon únikamente via banko. Servisio di impuesto ta keda modernisá.