Willemstad – Ontvanger di Kòrsou ta introdusí inovashon riba tereno di pago di impuesto i prima. Entrante yüli 2019 tur negoshi i persona privá por paga mayoria di impuesto i prima pa medio di e sistema di pago PAGOmátiko, di e mésun manera ku ya nan ta paga gastunan manera koriente, awa i impuesto riba desperdisio (afvalstoffenbelasting). Den un enkuentro ku prensa, Minister di Finansa Kenneth Gijsbertha, huntu ku Landsontvanger Alfonso Trona, a duna splikashon kiko a kondusí na e inovashon aki i kon e ta funshoná den práktika.

Minister di Finansa Kenneth Gijsbertha: “Gobièrnu su meta ta pa stimulá habitantenan i negoshinan na Kòrsou pa paga nan impuesto i prima na tempu i na e manera di mas efektivo i ekonómiko. Pagamentu di impuesto i prima na ofisina di Landsontvanger tin benefisio, pero tambe limitashon. E benefisio ta ku pagamentu no ta trese gastu kuné, pero su limitashon ta ku ofisina di Ontvanger ta habrí un sierto kantidat di ora so pa dia. E solushon ku Gobièrnu a trese aki ta grátis i e ta brinda hopi mas ora durante kua por hasi pago ku ta e kaso na Ontvanger. Pues e ta halsa e komodidat di e kliente, sigur mirando ku tin no ménos ku 122 punto di pago di PAGOmatiko na vários tipo di establesimentu rònt Kòrsou. Ademas e ta un solushon pa esnan ku pa diferente motibu ainda no ta hasi pago online.”

Míles di kliente ya tin hopi aña ta usa e servisio aki i un bentaha grandi adishonal ta ku e ta simpel. Trona ta splika: “Pa paga impuesto i prima ku PAGOmatiko tambe ta mésun simpel: mester bini ku e aanslag – esta e papel di belasting – riba kua por mira ta kua tipo di impuesto ta trata di dje, e montante i tambe e karakterístika di pago ku semper mester indiká komo deskripshon pa e pago. Esaki por ta un ‘betaalkenmerk’ òf un ‘aanslagnummer’. Despues di yena esaki, ta bon pa chèck sigur si e ta korekto. Despues ta konfirmá e transakshon i di e forma ei finalisá e proseso. Un servisio pues ku ta fásil, grátis i ku e kliente por hasi na e ora ku ta kumbiní e mes.”

Segun Trona e tipo di impuesto i prima ku por paga ta: AOV/AWW, AVBZ, Basis Verzekering Ziektekosten (BVZ), Nominale Premie di BVZ, Grondbelasting, Inkomstenbelasting, Logeergastenbelasting, Loonbelasting, Omzetbelasting (OB), Onroerende Zaken Belasting (OZB), Successiebelasting i Winstbelasting. Pa motibu tékniko sinembargo no ta posibel pa hasi pago ku PAGOmatiko den kaso ku e aanslagnummer tin un lèter aden. Esaki ta konta pa pago di èrfpagt, hür di domeingrond, number di outo i Ziektekosten i ongevallen (ZV/OV) i cessantia. Den kaso di betalingsregeling, si bin ku e areglo por skohe un aanslag, i riba esaki sí por paga. Meskos, den kaso ku bini ku un vordering, por skohe un aanslag i riba esaki sí por paga. Ademas tin un montante mínimo i un montante máksimo ku por paga pa medio di PAGOmátiko. No por hasi pago pa montante mas abou ku 10 florin. Pa kada forma di paga (kèsh, Maestro òf Kompa Leon), un montante máksimo ta aplikabel.