Disponibel na hulandes tambe

Minister di Finansa ta anunsiá ku a revoká e dekreto gubernamental ‘Eventonan Grandi 2010’ a remplasá e dekreto aki pa un dekreto nobo yamá ‘Areglo Ministerial Eventonan Grandi’. E efektonan positivo di e dekreto ‘Eventonan Grandi 2010’ ku a premirá, a ser realisá. Ta asina ku eventonan grandi ku a organisá ku artistanan internashonal a duna un aporte positivo na ekonomía di país, kaminda a buta Kòrsou riba plano internashonal di organisashon di eventonan di gran embergadura i alabés atrae kantidat grandi di bishitante ku ta bin pa eventonan grandi aki. E eventual surplus ku a generá dor di e eventonan grandi a ser duná na instanshanan karitativo. Esaki tabata motibu pa Minister di Finansa traha riba un dekreto mas ámplio.

E desaroyo aki ta, tàmbe konforme un konseho resién di Sociaal Economische Raad (SER), kaminda a konsehá Gobiernu pa konsiderá ampliashon di e dekreto gubernamental ‘Eventonan Grandi 2010’ i asina krea un impulso pa instanshanan karitativo organisá eventonan di magnitut internashonal, aksesibel pa un públiko mas ámplio i ku partisipashon di artistanan, deportistanan i/òf sientifikonan di renombre internashonal.

Asina den e dekreto nobo di ‘Areglo Ministerial Eventonan Grandi’ ta amplia  definishon di e konsepto di artista personan riba tereno di siensia, kultura i deporte.

Bou di e definishon di “eventonan grandi” ta kai diferente tipo de evento, manera; evento musikal, evento sinematográfiko, produkshon i/òf grabashon di sine, baile i evento kultural, entretenimentu, evento deportivo i konferensha. E organisadó di un evento grandi mester ta un organisashon karikativo sin fin komersial.

E espektativa ta, ku e ampliashonan anteriormente menshoná, Kòrsou lo ta mas atraktivo pa organisashon di evento musikal, sinematográfiko, produkshon i/òf grabashon di sine, baile i evento kultural, entretenimentu, evento deportivo i konferensha, lokual riba su bùrt ta kontribuí ku desaroyo sosialekonómiko di Kòrsou.