Riba 14 di yüni 2021, gabinete Pisas II a hurá. Den e kuadro aki señor mr. drs. Javier Silvania a asumí e enkargo di Minister di Finansa i ta ser asistí pa un ekipo di konsehero enkabesá pa señora Jeannitza Felix Msc.
Pa optimalisá funshonamentu di e ekípo di Ministerio di Finansa, ta nesesario pa bini algun kambio den e tim di Minsterio di Finansa. Den e kuadro aki, Ministerio di Desaroyo Ekonómiko lo pone un miembro di su personal disponibel na Ministerio di Finansa pa medio di interkambio di personal, asina yamá ‘swap’, kaminda e Sekretario General (SG) di Ministerio di Finansa lo bai Ministerio di Desaroyo Ekonómiko. Minister di Finansa, mr. drs. Javier Silvania, kier yama danki na e aktual SG di Ministerio di Finansa, señora drs. Ersilia de Lannooy, pa e trabou ku e a hasi den pasado pa Ministerio di Finansa.”Nos ta desea señora de Lannooy masha éksito ku e paso nobo aki den su karera. Nos ta spera ku di e forma aki e por duna aún mas balor agregá na Pais Kòrsou”.