Willemstad – Durante su partisipashon na e reunion anual di hunta di direktiva di Banko Mundial i Fondo Monetario Internashonal, Minister di Finansa sr. Kenneth Gijsbertha a firma un akuerdo di duna asistensha konosí komo Reimbursable Advisory Services (RAS) ku Banko Mundial. Reimbursable Advisory Services (RAS) ta un programa kaminda Banko Mundial ta ofresé asistensha tékniko, servisio analítiko i sosten ku implementashon di maneho òf programa riba petishon di e pais. Kòrsou a buska asistensha pa evaluashon di nos sistema finansiero pa rísiko di labamentu di plaka i finansiamentu di terorismo. Ta importante pa nos komo pais sa unda nos ta vulnerabel pa e tipo di práktikanan aki. Konsekuentemente e konfiansa internashonal den nos sektor finansiero lo oumentá.

Na firmamentu di e akuerdo, direktor regional Banko Mundial pa area di Karibe señora Tahseen Sayed a duna Kòrsou kòmplimènt pa e manera rápido ku nos a atendé pa yega na e akuerdo di asistensha. Usualmente e proseso di yega na e akuerdo aki ta tuma dos aña. Kòrsou a kuminsá deliberashon na mart di e aña aki i na òktober kaba a firma e akuerdo.

Un grupo di trabou nashonal konsistiendo di profeshonalnan di Ministerio di Finansa, Banko Sentral di Kòrsou i St Maarten (CBCS) i Financial Intelligence Unit (FIU) antes MOT, ku sosten di konseheronan di Banko Mundial lo ta enkargá ku e tarea aki. E trabou ta kuminsá febrüari 2018.
Ku Fondo Monetario Internashonal minister Gijsbertha a palabrá ku e tim di ‘Article IV Mission’ lo bishitá Kòrsou den desèmber. Esaki ta un tim di Fondo Monetario Internashonal ku ta bishitá pais miembro pa hasi un sondeo di desaroyo ekonómiko general den e pais, di su maneho dirigí pa mantené stabilidat ekonómiko, un balansa eksterno sustenibel i liberashon di komersio internashonal.

Meta di e reunion anual di hunta di direktiva di Banko Mundial i Fondo Monetario Internashonal ta pa trese tur banko sentral, ministernan di finansa i desaroyo, parlamentarionan, sektor privá, ehekutivonan, representante di organisashon sivil i akadémiko pa diskutí prekupashonnan di interes global manera pronóstiko di ekonomia mundial, kaba ku pobresa, desaroyo ekonómiko i efekto di yudansa.
E aña aki tópikonan prinsipal pa Karibe i paisnan chikí tabata:

• Impakto di banko di korespondensha riba ekonomia; 
• Determinashon pa konstruí bèk despues di destrukshon di naturalesa.

Den kaso di e tema di banko di korespondensha, un par di luna pasá Merka a introdusí sanshon pisá den forma di multa ekstremadamente haltu pa su bankonan den kaso ku konstatá ku nan a pèrmití labamentu di plaka i transakshon ku ta finansiá organisashon terorista pasa via di nan kanalnan. E bankonan na nan turno a tuma medida pa minimalisá nan rísiko ku esaki por pasa ( derisking). Nan a stòp transakshon ku bankonan den paisnan ku nan no ta sigur ta sigui regla di kumplimentu ku lei manera mester ta. Paisnan chikí ta esnan ku e desishon aki a impaktá mas. Durante e seshon di Small States Forum a bin dilanti ku hopi di paisnan chikí ta dependé di e sèn ku nan famia afó ta manda pa nan i aworakí esaki a baha drástikamente pa motibu ku alternativa pa manda sèn ta hopi karu. E konklushon di seshon riba e tema aki tabata ku paisnan chikí tin ku traha huntu pa sostené otro pa yega na un solushon. Presidente di Fondo Monetario Internashonal señora Christine Lagarde a reta tur pais chikí presente pa pensa ‘out of the box’ pa yega na solushon pa e asuntu aki i tur otro asuntu ku ta hungando un ròl aktualmente.

E tema determinashon pa konstruí bèk despues di destrukshon di naturalesa a fokùs riba impakto di orkan riba region di Karibe e aña aki. Durante kòmbersashonnan riba e tópiko islanan di Karibe a bisa ku e kos di mas importante despues di e orkan ta fondo pa nan por traha mesora riba rekuperashon ekonómiko. Minister di Finansa demishonario di St Maarten sr. Richard Gibson a konta di su eksperensha resien ku Irma i ku e proseso di rekuperashon lo tin impakto riba budget di gobièrnu di St. Maarten pa próksimo añanan.
Durante un di e seshonnan riba e tema aki, tokante komersio eksterior i koperashon di desaroyo sra. Lilianne Ploumen di Ulanda minister, demishonario na e momentu ei, a konta ku tabata posibel pa Ulanda duna asistensha lihé na St. Maarten ta danki na koperashon den Reino via di Kòrsou ku e por a hasi esaki. E a yama Kòrsou públikamente danki pa su koperashon.

Reunion di hunta di direktiva di Banko Mundial i Fondo Monetario Internashonal a tuma lugá di 11 pa 16 di òktober na Washington, D.C.