Bo tin algun pregunta? Klek riba e siguiente link.
Tuma kontakto >Publiká riba 29 June 2016
Disponibel na hulandes tambe
Resientemente Minister di Finansa dr. José M.N. Jardim a hasi un biahe di trabou pa Cuba kaminda a atende siguente puntonan ku outoridatnan Cubano: Koperashon Tékniko; Asuntunan Fiskal i Koperashon riba tereno di Energia
E prome punto tokante Koperashon Tékniko, ta sirbi pa trese mas klaridat di parti di Cuba pa haña asistensha tékniko den areanan di interés mutuo.
Cuba a indiká ku nan kier koperá riba e área aki, ku e meta pa promové interkambio i transferí konosemento. E areanan di koperashon definí ta: preparashon di presupuesto di mas aña huntu ku proyekshon di mas aña, preparashon di kuentanan anual ku ta kumpli ku normanan vigente, asistensia riba área fiskal i finalmente koperashon entre Banko Sentral di Cuba i Banko Sentral di Kòrsou i St. Maarten.
Durante e biahe aki a palabrá un agènda di trabou pa 2016 i lo sera aña ku un evaluashon.
Pa loke ta trata e di dos punto di diskushon Asuntonan Fiskal, e bishita di trabou aki a sirbi pa kontinuashon di elaborashon di un tratado pa evitá pagamentu dòbel di impuesto òf tributashon dòbel entre Cuba i Korsou. Partidonan a yega na un akuerdo tokante kontenido di e tratado di Asuntonan Fiskal i finalmente a parafeer e tratado na Habana. E importansia di e tratado ta pa evitá pagamentu dòbel di impuesto entre Cuba i Kòrsou ta hopi ligá ku laso ekonómiko. E tratado fiskal ta sòru pa un kuadro ku ta fasilitá laso ekonómiko i ta duna empresanan kapasidat pa planifiká pa tempu mas largu i speshal den e ámbito di invershon. Ademas, un tratado fiskal pa evita dòbel tributashon ta harmonisá definishon di pagamentu di impuesto entre ambos país.
Ademas e akuerdo aki ta tambe e promé paso, ku e meta pa yega na posishoná
Kòrsou komo hub logístiko di Karibe i Latino Amerika.
E tratado aki ta tambe e siguiente paso pa fortalesé Kòrsou su posishon komo Sentro Finansiero Internashonal ku ta kumpli ku standartnan haltu.
E di tres punto ta hopi ligá ku e amplio eksperensia ku Kòrsou tin, en partikularmente riba tereno di energia di bientu i menos riba tereno di energía solar.
E kontrapartidonan na Kuba tin interés pa konosé e manera ku ta introdusí energia sostenibel na Kòrsou, en partikular aspektonan relashona ku stabilidat di e ret, e manera kon ta manehá e parke di molina di bientu i e ehèmpel di produkshon mikro di panel solar.
Den e kuadro aki Kòrsou por fungí pa Cuba manera un laboratorio riba tereno di energía sostenibel. Ta asina ku diferente kondishon na Cuba i Kòrsou ta similar.
E diferensia di eskala t’ei presente, pero e punto sentral ta similarilidat entre ambos país. Dor di rekonose similarididatnan aki, a firma un deklarashon di entendimentu (MOU) na Habana.
Pa medio di esaki, ta kompartí eksperensia mutuo i asina ta krea oportunidad pa traha huntu riba plano internashonal.
Finalmente ku partisipashon di e delegashon, a establesá kontakto entre sektor privá di Kòrsou i autoridatnan Kubano. Resultado ta ku tin un kuadro denter di kua koperashon entre Cuba i Kòrsou por tuma lugá for di aña 2016 di un manera mas estrecho.