Disponibel na hulandes tambe

Ministerio di Finansa i Ministerio di  Asuntunan Desaroyo Sosial, Labor i Bienestar ta informá komunidad lo siguiente:

Komo parti di medidanan di  ousteridat pa mantené e Fondo General di Penshun di Behes  (AOV) i tambe Fondo di Penshun di Biuda y Huérfano  (AWW) sostenibel, a disidí ku indeksashon ta ser mará na kresementu ekonómiko nominal.  A base di esaki no tabatin adaptashon na yanüari  2015 pa aña 2014 riba e fondonan ariba menshoná.

Sinembargo, finansa públiko tin espasio pa  un kompensashon basá riba subida di kosto di bida pa tur kobrado di Penshun di Behes i Penshun di Biuda i Huérfano den forma di pago di un lùmpsùm. Ta trata aki di un pago èkstra, ku no tin karakter permanente. Na 2016 lo evaluá di nobo e situashon pa aña 2015. 

Gobièrnu a disidí ku e grupo di kobradó di ònderstant tambe lo haña un (1) pago èkstra pa kompensá oumento di kosto di bida.

Gobièrnu ta di opinion ku esaki ta trese un algu di alivio na e situashon sosial di e gruponan spesífiko aki i lo sigui hasi esfuerso pa sigui duna apoyo na e gruponan aki kaminda esaki ta nesesario i posibel.