Willemstad- Na mei 2010 CFATF a disidí ku Kòrsou lo mester pasa raportá periódikamente over di e adelantonan pa remediá e defisiensianan ku a wòrdu señala den su strukturanan pa por evita labamentu di plaka i finansiamento di terorismo.

E defisiensianan tabata relashoná ku fayonan den nos leinan i alabés den nos proseduranan. Delaster añanan esakinan a keda remediá di tal manera ku den su reunion di 9 di november di aña 2016 CFATF a disidi di kita Kòrsou for di e ‘lista’ di paísnan ku mester raportá periódikamente over di e pasonan pa remedia e defisiensianan pa asina por kumpli ku e normanan internashonal pa evita labamentu di plaka i finansiamento di terorismo.

Den e trayekto aki e efikasia di Ministerio di Finansas, en partikular riba tereno di e adaptashonnan nesesario di nos kwadro legal, a permití nos remediá e defisiensianan ku CFTATF a konstatá. E adaptashonnan aki a kondusí ku e Sekretariado di CFATF a konkluí ku Kòrsou no mester forma parti mas di e lista ei. E resultado aki ta di sumo importansia pa por reposishoná Kòrsou komo un hurisdikshon íntegro kaminda ta hasi negoshi kumpliendo ku e normanan internashonal mas eksigente. Atrabés di e kambio di nos klasifikashon dor di CFTATF, indusí dor di e adpatashonnan legal ku Kòrsou a introdusí, riba dia 9 di November 2016 na Turks and Caicos a keda disidí pa atribuí e klasifikashon di Largely Compliant na Kòrsou.