Skohe un tópiko 
Bo tin pregunta?
Kompartí e página aki
Kobransa di Impuesto Atrasá
Publiká riba 8 July 2021
Minister di Finansa a duna instrukshon pa agilisá kobransa di impuesto atrasá
Willemstad – Minister di Finansa sr. mr. drs. Javier Silvania a introdusí liñanan di guia pa agilisá kobransa di impuesto atrasá, pa asina yuda hisa entrada pa kaha di gobièrnu. E akshon di kobransa aki ta konta pa entre otro: impuesto riba entrada, impuesto di salario, impuesto riba ganashi, impuesto riba herensia, onroerendezaakbelasting (OZB), impuesto riba benta i impuesto pa rekohé shushi.
Minister di Finansa ta enfatisá ku e tèrmino pa yega na areglo di pago pa sana debe ta konta pa solamente 3 luna, kual ta drenta na vigor djaluna 12 di yüli i ta términa 12 di òktober 2021.
Penshonadonan ku ta kobra solamente AOV via di SVB lo haña eksonerashon di onroerendezaakbelasting (OZB).
Personan ku ta bin na remarke pa hasi apelashon pa sana nan debe di impuesto mester a risibí nan deklarashon di impuesto ku ta fechá 31 di desèmber 2020 o riba un fecha anterior.
Den kaso ku e debe atrasá di impuesto ta menos ku 50.000 florin, e kobradó por duna, riba petishon di e pagadó, oportunidat pa e pagadó di impuesto paga su debe mensual te na un máksimo di 48 luna.
Altura di e suma di sanamentu di debe ta dependé di e promé suma ku e debedó ta paga mes ora. Pa esnan ku tin un debe di menos 100.000 florin e promé suma grandi ku tin ku paga den un tiru ta varia entre 10 i 60 porshentu di e debe di impuesto. Anto sanamentu di e debe ta varia entre 10 i 40 porshentu di e debe di impuesto. Pa esnan ku tin un debe mas ku 100.000 florin e promé suma grandi ku tin ku paga den un tiru ta varia entre 20 i 70 porshentu di e debe di impuesto. Anto sanamentu di e debe ta varia entre 5 i 30 porshentu di e debe di impuesto. Mas tantu e debedó di impuesto paga promé bes den un tiru, mas tantu redukshon di su debe di impuesto.
Inmediatemente despues ku entregá un petishon firmá pa sana debe di impuesto mester hasi e pago na Ontvanger. Despues di e promé pago por yega na un areglo di pago pa un periodo di máksimalmente 48 luna pa paga e montante di debe ku a sobra.
Pa por apliká pa e sanamentu di debe aki, tin sierto kondishon ku ta aplikabel.
Ta otorgá sanamentu konforme siguiente tabèl:
| Porsentahe di sanamentu | Debe di 2020 i mas bieu
Debe < 100.000 Pago mesora |
Porsentahe di sanamentu | Debe di 2020 i mas bieu
Debe > 100.000 Pago mesora |
| 40% | 60% | 30% | 70% |
| 30% | 50% | 25% | 60% |
| 25% | 40% | 20% | 50% |
| 20% | 30% | 15% | 40% |
| 15% | 20% | 10% | 30% |
| 10% | 10% | 5% | 20% |
| 0% | 0 | 0% | 0 |
Mirando importansia di kobransa di impuesto pa maneho finansiero di pais, a yega di duna instrukshon den pasado na empleadonan ku di un forma o otro tabata enbolbí den ehekushon di di e proseso di kobransa. Di otro banda e liñanan di guia ta parti di maneho interno di Ontvanger dor di kua tabatin poko transparensia pa pagadónan di impuesto.
Meta di publikashon di e liñanan di guia pa medio di instrukshon ta pa trese uniformidat i struktura den e proseso di kobransa. Ku e instrukshon aki ta trata tambe di garantisá seguridat hurídiko di e siudadano. Ku uso di e liñanan di instrukshon empleadonan di Ontvanger lo atendé e proseso di kobransa, pa tur ku debe impuesto, sin distinshon di persona.
Kòntròl riba kumplimentu di reglamentunan lo tuma lugá periódikamente o a lo menos un bia pa luna dor di Stichting Overheidsaccountantsbureau Curaçao (SOAB).
Pa mas informashon por tuma kontakto riba number 734-2224 òf via siguiente e-mailadres: sanering@gobiernu.cw
Pa mas informashon tokante e liñanan di guia por klek riba:
www.minfin.cw/Richtlijnen ter invordering van belastingen
www.minfin.cw/Toelichting bij de richtlijnen ter invordering van belastingen