Último añanan e tereno fiskal internashonal a kambia inmensamente. Ku aporte polítiko di lidernan di G20, e komunidat internashonal a tuma akshon huntu pa elevá transparensia i kambio di informashon riba tereno fiskal i pa atendé debilidatnan di e sistema fiskal internashonal ku ta krea oportunidat pa eroshon di base fiskal i movementu di ganashi esta BEPS  (“Base Erosion Profit Shifting”). E normanan di akuerdonan internashonal pa ku transparensia i kambio di informashon riba tereno fiskal a buta un fin na e era di sekresia di banko.

Aktualmente mas ku 150 pais i hurisdikshon partisipando, Global Forum on Transparency and Exchange of Information for Tax Purposes a sigurá for di nan establesimentu na aña 2009 te ku awor aki un implementashon konsistente i efektivo di e normanan pa ku transparensia internashonal.

E krísis finansiero i planifikashon fiskal agresivo di kompanianan multinashonal a pone BEPS haltu riba e agènda polítiko.

Na sèptèmber 2013, lidernan di G20 a aprobá e ambisioso i ekstenso akshon di plan di BEPS. A base di e plan di akshon OECD (Organisation for Economic Co-operation and Development) i paisnan di G20 den dos aña a desaroyá i aprobá un pakete di medida. E pakete aki ku paisnan mester komprometé nan mes kuné ta konsistí di 15 akshon.

E meta prinsipal pa e akshonnan aki ta pa trese transparensia fiskal i pa kada pais por kobra impuesto riba e parti ku ta toka nan. For di un punto di bista ku for di fin di añanan 90, Kòrsou a skohe pa ta un hurisdikshon transparente. Na 2016 Kòrsou a sigui riba e rumbo aki i a komprometé su mes na e mínimo, kual ta 4 punto di akshon for di e 15 puntonan, ku ta akshon di puntonan di BEPS 5, 6 en kombinashon ku 15, 13 i 14.

E interkambio di reportahe di paisnan (“landenrapportage”) ta akshon number 13 di BEPS.

E reportahe di paisnan (“landenrapportage”) ta pa interkambiá informashon dor di e kompanianan multinashonalnan ku un total di benta di e grupo riba 1.5 mil mion (“miljard”) florin (riba nivel mundial) anualmente. Nan tin ku raportá nan informashon na Kòrsou i Kòrsou na su turno ta interkambiá esaki ku tur pais den kual e kompanianan di e grupo aki ta establesé.

Tin un dekreto gubernamental  tambe mará na e konsepto di lei aki, kual ta duna eksaktamente kua informashon lo mester entregá na Inspekshon di impuesto pa  interkambio internashonal. Resientemente Hunta di Konseho (“Raad van Advies”) a trata e dekreto gubernamental.

Introdukshon di e lei aki ta hopi urgente. Si nos komo Pais no a hinka e akshon number 13 di BEPS den nos lei,  esei lo a nifiká ku Kòrsou no ta kumpli ku  kompromisonan internashonal.

Den kuadro di transparensia i pa enforsa kòntròl pa ku esaki e lei aki tambe ta regla e obligashon pa e asina yamá “stichting particulier fonds” (SPF) pa hasi for 1 yanüari 2019 deklarashon di impuesto riba ganashi (“aangifte di winstbelasting”). E kambio aki no ta kambia e echo ku ketu bai a base di artíkulo 2, insiso 1, bou di h, di e Landsverordening op de winstbelasting 1940 un SPF, ta eksonerá pa impuesto di ganashi (“vrijgesteld pa winstbelasting”) i lo no ta tin ku paga impuesto riba ganashi (“winstbelasting”), basta ku e ganashi no ta sali for di operashon di negoshi (“winst voortvloeit uit bedrijf”).

OECD a evaluá Kòrsou konforme BEPS 5 i a konkluí ku Kòrsou tin 3 régimen preferensial, ku ta “vrijgestelde vennootschap”, “exportregeling” i “e-zone regeling” i ku tin ku adaptá esaki konforme reglanan di OECD. Pa ku esaki Gobièrnu tin un proyekto di lei den proseso pa kambia e 3 régimennan aki i den e proyekto di lei aki lo bini ku otro proposishon pa stimulá e ekonomía di Kòrsou.

Den kuadro di e asina yamá “Nexus approach” di BEPS 5, kaminda ku no por tin propiedat intelektual (IP) sin supstansia “substance”, OECD a evaluá Kòrsou tambe i a konkluí ku e propiedat intelektual (IP) menshoná den lei pa loke ta trata e “vrijgestelde vennootschap” i e “exportregeling” no tin supstansia “substance” i ku Kòrsou lo tin ku adaptá esakinan promé ku 1 di yüli 2018. Komo ku e trayekto di un proyekto di lei ta largu i pa evitá ku 1 di yüli 2018 ta yega i e lei pa loke ta trata propiedat intelektual (IP) den “vrijgestelde vennootschap” iku no a adaptá e “exportregeling”, Gobièrnu a skohe pa saka e parti di propiedat intelektual (IP) sin supstansia “substance” for di e “vrijgestelde vennootschap” i e “exportregeling” den e lei aki, pa despues den e otro proyekto di lei, manera anteriormente menshoná, bini ku otro proposishon pa ku esakinan.

Ku e splikashon menshoná, mester keda kla pa un i tur ku SPF lo sigui ta eksonerá di impuesto di ganashi (“winstbelasting”). E parti di proyekto di lei aki ta drenta na vigor entrante aña 2019 i konsekuentemente e promé deklarashon di impuesto ta tuma lugá na aña 2020.