Willemstad – Poko poko pero sigur Ministerio di Finansa ta yegando na solushon pa duna servisio na klientenan di Ontvanger i Inspekshon di Impuesto. Pa loke ta trata SBAB, lo anunsiá pronto ki dia nan lo reanudá nan servisio. Apesar ku e edifisio di SBAB no a sufri daño, mester warda outoridat, ku ta hasiendo investigashon duna pèrmit pa drenta e edifisio.

Inspekshon di Impuesto
Pa servisio di Inspekshon di Impuesto por akudí na ofisina di Centrale Debiteurenadministratie entrante djamars 27 di ougùstùs 2019. Klientenan
por bin entregá dokumentonan manera verzoekschrift òf bezwaarschrift.
E ofisina di Centrale Debiteurenadministratie ta keda den edifisio di Pietermaai Parking Mall Unit 16A i 16B na Pietermaai. Pa informashon por yama number 432-8400.

Ontvanger
Entrante djamars 27 di ougùstùs 2019 Ontvanger ta habri lokèt na ofisina di SVB, Pater Euwensweg 9 na Otrobanda. E servisio ku Ontvanger ta ofresé pa e momentu aki ta benta di stampia i doktersverklaring. Pago di impuesto ta kontinuá normal via di banko i PAGOmátiko. Pa pregunta por akudí na loket di Ontvanger na SVB òf yama number 434-4100.
Pa loke ta trata otro servisio ku Ontvanger no por duna ahinda, lo anunsiá mas pronto posibel riba ki término por duna otro servisionan tambe.