Ministerio di Finansa pa medio di e komunikado aki kier informá pueblo di e efekto di  trabou ku a bin ta tuma lugá na Inspekshon di Impuesto i Ontvanger. Resientemente Minister di Finansa a tuma diferente akshon pa kobra sèn di impuesto ku no a paga ahinda. A subi presupesto di Stichting BAB, di moda ku por kontratá persona pa yuda ku kòntròl na establesimentu pa kumplimentu ku lei di omzetbelasting. Tambe a reforsá Ontvanger pa por hasi trabou di kobransa mas efisiente. Por último a publiká ‘Richtlijnen ter invordering van belastingen’ ku e meta pa kobra sèn di impuesto atrasá

Konforme presupuesto pa luna di yüni, Ontvanger lo a kobra un montante total di 78.5 mion florin na loonbelasting, omzetbelasting, onroerendezaakbelasting/grondbelasting, motorijtuigenbelasting, overdrachtsbelasting, inkomstenbelasting i otro impuesto. Pa luna di yüni e realisashon tabata 78.9 mion florin, kual ta 400.000 florin mas haltu ku presupuesto pa luna di yüni. Pa luna di yüli e proyekshon tabata 76.6 mion florin. E montante realisá den yüli tabata 92.2 mion florin. Pues un montante di 15,6 mion mas haltu ku presupuestá. Den e kuadro aki ta referí na e skema aki bou.

Aki por mira ku entrada di loonbelasting i omzetbelasting den tantu yüni komo yüli ta mas haltu ku den e presupuesto. Den ougùstùs e omzetbelasting i overdrachtsbelasting tabata mas haltu ku proyektá. Tambe por mira ku e montante total na winstbelasting di yüni i yüli huntu ta mas haltu ku inisialmente tabata proyektá. E realisashon total di entrada di belasting pa yüni, yüli i ougùstùs ta mas haltu ku e proyekshon.

E entrada di prima i seguro sosial tambe tabata mas haltu ku presupuesto pa lunanan yüni i yüli. Konforme presupesto, den luna di yüni, Ontvanger lo a kobra un total di 56.3 mion florin na prima i seguro sosial. E realisashon tabata 59.3 mion florin, kual ta 3 mion florin mas haltu ku e montante presupestá pa luna di yüni. Pa luna di yüli tabatin un montante di 56.3 mion den presupuesto pa loke ta trata seguro i prima sosial. E realisashon tabata 65.9 mion florin, esta 9.6 mion florin mas haltu ku e presupuesto.

Sifra ta indiká tambe ku, ku eksepshon di ZV/OV, tur entrada di prima i seguro sosial ta igual òf mas haltu ku e entrada ku tabata inisialmente proyektá pa luna di yüni i yüli. Den ougùstùs tabatatin entrada di seguro i prima sosial mas abou ku inisialmente proyektá. Esaki por ta konsekuensia di e echo ku e portal di NOW no ta habrí ahinda.

Gobièrnu kier yama danki na tur siudadano ku a kumpli ku nan obligashon fiskal, paso mas entrada gobièrnu tin, mas e por kumpli ku pueblo.

Ministerio di Finansa, SBAB, Inspectie i Ontvanger lo sigui ku akshon ku a bin ta tuma lugá den kuadro di kobransa di impuesto i informá pueblo di desaroyo den e kuadro aki.