Willemstad – Ministerio di Finansa  ta anunsiá ku entrante 1 di ougùstùs próksimo Centrale Debiteuren Administratie (CDA), e Servisio di Kobransa ku ta enkargá ku kobransa di uzo di tereno di èrfpagt, tereno di hür, ‘Afvalstoffenbelasting’ i ‘Horecavergunning’, lo kuminsá ku e trayekto di desmantelashon di e servisio. Esaki ta nifiká ku entrante 1 di ougùstùs klientenan di Centrale Debiteuren Administratie mester akudí na lokalidatnan diverso pa atendé nan asuntunan di keho, faktura i pago di uzo di tereno di èrfpagt òf tereno di hür. Lo repartí tareanan di fakturashon i  kobransa di uzo di tereno di èrfpagt i tereno di hür entre Domeinbeheer i Ontvanger. CDA ta supliká tur kliente pa paga bon tinu na e kambio aki i e konsekuensianan personal ku e por tin mará na djé. Tareanan di Afvalstoffenbelasting i Horecavergunning lo keda por lo pronto na Centrale Debiteuren Administratie na Schottegatweg Oost 112 na Saliña te ora e proseso di desmantelashon terminá.

 Repartishon di tarea enkuanto èrfpagt i tereno di hür entrante 1 di ougùstùs 2018

 Servisio di Domeinbeheer

Entrante 1 di ougùstùs 2018 Domeinbeheer lo ta e servisio enkargá ku e tarea di fakturashon di tantu uzo di tereno di hürkomo fakturashon di uzo di tereno di èrfpagt. Den e kuadro aki, Sentro di Servisio Domeinbeheer lo kontestá tur pregunta ku tin di haber ku kontenido di faktura. Esaki ta nifiká ku si por ehèmpel bo a risibí faktura pa pago di uso di un tereno ku ya no ta di bo mas, bo mester akudí na Sentro di Servisio Domeinbeheer na World Trade Center na Piscadera. Si e suma riba e faktura no ta korekto, tambe bo mester akudí na Domeinbeheer pa entregá keho. Pa pregunta por tuma kontakto ku Sentro di Servisio Domeinbeheer na  0800-1919.

 Servisio di Ontvanger

Entrante 1 di ougùstùs 2018 Ontvanger lo ta enkargá ku kobransa di faktura di tereno di èrfpagt i tereno di hür. Ontvanger lo kontestá tur pregunta ku tin di haber ku pago di faktura. Esaki ta nifiká ku si por ehèmpel bo a hasi un pago, pero Ontvanger no a proses’é, bo mester akudí na Ontvanger na Regentesselaan z/n na Emmastad.

Atenshon! Entrante 1 di ougùstùs Ontvanger lo kuminsá deskontá tambe debe di èrfpagt i tereno di hür di e kliente for di e suma di restitushon ku e kliente lo mester haña bèk serka Ontvanger pa aña. Lo hasi esaki te na momentu ku e kliente no tin debe mas. Pa sera un areglo di pago i/òf hasi pregunta tokante prosedura di kobransa, por ehèmpel tokante  ‘aanmaning’ i ‘dwangschrift’, mester akudí na Ontvanger. Pa pregunta por tuma kontakto ku Ontvanger na 734-2224. Pa klientenan ku ya ta asigná na un amtenar ku ta enkargá ku areglo di pago i kobransa, e klientenan aki por tuma kontakto ku e amtenar via di e number di telefòn ku ya ta konosí pa e kliente.

Meta di e traspaso aki ta pa drecha kalidat di servisio na públiko i alabes hasi fakturashon i kobransa mas efektivo i efisiente.