Disponibel na hulandes tambe

Minister di Finansa, dr. José Jardim, ta informá ku den reunion semanal di Konseho di Minister a disidí ku na kuminsamentu di febrüari 2015 lo tin un redukshon den preis di derivadonan di krudo. 

Entrante 3 di febrüari ta trata di bahada di preis di gasolin ku 22 sèn (tabata 1,82 i ta bira 1,60) i diesel ku 32 sèn (tabata 1,61 i ta bira 1,29). Bòm di gas di grandi (100 liber) ta baha ku NAfl. 6,50 (tabata 66,50 i ta bira 60,00) i bòm di gas chikitu (20 liber) ku NAfl. 1,30 (tabata 14,80 i ta bira 13,50). Finalmente entrante promé di febrüari tarifa promedio di koriente ta baha ku 6 sèn pa kW/ora i tarifa promedio di awa ta baha ku 34 sèn pa meter kúbiko. 

Bahada di preis di produktonan ariba menshoná ta primeramente konsekuensha di kaida di preis di petroli riba merkado internashonal, prinsipalmente durante último lunanan. Gobièrnu ta satisfecho ku despues di varios aña por baha preis di gas pa kushiná, loke tin benefisio direkto pa mayoria siudadano den nos pais. Entrante 3 di febrüari preis di gas komersial tambe lo keda redusí ku mas o menos 10% dor di Curoil. 

Bahada di preis di produktonan di energía ta resultá den menos gastu pa poblashon i empresarionan na Kòrsou. Gastu di energía na luna di yanüari 2015 na Kòrsou a resultá mas o menos 6 miyon florin menos kompará ku yanüari 2014. Komparashon entre febrüari 2015 i febrüari 2014 ta mustra menos gastu pa un total di mas o menos  10 miyon florin. Gobièrnu ta konfia ku esaki lo aportá pa fortalesé desaroyo sosio-ekonómiko di nos pais. Gobièrnu ta konsehá pa kada persona i instansha disidí riba uso responsabel pa e espasio finansiero adishonal aki. Teniendo kuenta ku desaroyonan riba merkado internashonal, ta vislumbrá ku preis di petroli no ta sigui baha mas.